Tiro ehf.

Tiro er fyrsta fyrirtækið sem býður almennan aðgang að talgreini fyrir íslensku þar sem notendur færa íslenskt tal yfir í texta og geta svo unnið með hann í ritli.

Tiro stefnir að því að vera sífellt í fremstu röð hvað varðar bæði gæði og úrval lausna á sviði talgreiningar fyrir íslensku. Tiro leggur ríka áherslu á að auka gæði talgreina sinna með því að nýta nýjustu tækni sem í boði er á sviði talgreiningar og jafnframt með því að tileinka sér aðferðir sem kynntar eru í rannsóknarheiminum hverju sinni.

Fyrirtækið hóf starfsemi sína í kjölfar styrks sem aðstandendum þess var veittur af hálfu Tækniþróunarsjóðs í þeim tilgangi að þróa talgreini fyrir röntgenlækna.

Nafnið

Heiti fyrirtækisins er sótt í eftirnafn þræls, og síðar þjóns Cicero, að nafni Marcus Tullius Tiro. Tiro er sagður hafa skrifað niður allar ræður Cicero og gefið þær út eftir að Cicero féll frá. Tiro er einnig sagður hafa komið fram með fyrstu hraðritunartæknina til að sinna verkefnum sínum.

Rannsóknir

Grunnurinn að starfsemi Tiro er fenginn úr rannsóknum sem stundaðar hafa verið síðastliðin ár innan Gervigreindarseturs Háskólans í Reykjavík. Eigendur fyrirtækisins koma frá Mál- og raddtæknistofu Gervigreindarsetursins (e. Language and Voice Lab (LVL)).